Category: Хийгдэж буй ажиллууд

Эх хүүхдийн эрхийг хамгаалах баярын өдрийг “Монгол хүүхдүүд” сэдвийн хүрээнд зохион байгуулахаар болсон талаар өнөөдөр нийслэлийн Засаг даргын Тамгын газар, болон Нийслэлийн Соёл урлагийн газар, Нийслэлийн Хүүхэд, гэр бүл хөгжлийн газар, Улаанбаатар хотын Замын цагдаагийн алба зэрэг холбогдох байгууллагаас мэдээлэл хийлээ.

Монгол хүүхдүүдийн оюун санаа, бие бялдар, бодох сэтгэх онцлогт нийцсэн уламжлалт 15 нэр төрлийн наадгайгаас хүүхэд багачуудын сайн мэддэг 6 төрлийг онцлон “Уламжлалт наадгайн баатрууд”-ыг хүүхэд багачуудад зориулан шинээр бүтээн гаргаж байгаа юм.

Монголын архитекторуудын эвлэл, ISENSO компани зохион байгуулсан Италийн Дизайны Өдөрлөг амжилттай зохион байгуулагдлаа.

Энэхүү өдөрлөгийн гол зорилго нь Итали – Монголын архитекторуудын хамтын ажиллагааг өргөжүүлэх, харилцан суралцаж, туршлага солилцох явдал байлаа.

Арга хэмжээг нээж МАЭ-ийн ерөнхийлөгч Э.Хүрэлбаатар, Итали улсаас Монгол улсад суугаа Элчин Сайд Андрэа Дэ Фэлип, НСУГ-ийн Соёлын хэлтсийн дарга М.Мөнхсайхан нар мэндчилгээ дэвшүүлэв.

Тус өдөрлөгт Италийн архитектор, дизайны салбарын тэргүүлэгчид болох B&B компанийн төслийн албаны дарга Alberto Beretta, Promemoria компанийн захирал Davide Sozzi болон Азийн салбарын борлуулалт хариуцсан захирал Arianna Borgonovo, Lualdi компанийн захирал Stefano Lualdi, Studio O компанийн үүсгэн байгуулагч, ерөнхий архитектор Effi Meridor нар зочноор оролцон байгууллагынхаа амжилтын талаар болон олон талт үйл ажиллагааны онцлог, түүхэн замнал, арвин туршлагаа хуваалцлаа.

Өдөрлөгт МАЭ-ийн гишүүд, НСУГ, Барилгын салбарын төлөөлөл, Интерьер дизайн, Архитектор мэргэжлээр суралцаж буй оюутнууд, ШУТИС-ийн багш нар оролцлоо.

 НИЙСЛЭЛИЙН СОЁЛ, УРЛАГИЙН ГАЗАР

Нийслэлийн Ерөнхий боловсролын сургуулийн багш нарын зааж байгаа хичээлийнхээ хүрээнд сурагчдыг зөв зан чанарт сургах, хотын соёлд суурь өөрчлөлт хийх боломжийг гаргах  зорилгоор “Зөв зан чанар-Хотын соёл” илтгэлийн уралдааныг зарласан.

“Өөрчлөлтийг чиглүүлэгч төв” ТББ-аас санаачлан Нийслэлийн Соёл, урлагийн газар, Нийслэлийн Боловсролын газрын дэмжлэгтэйгээр хамтран Нийслэлийн Ерөнхий боловсролын сургуулийн багш нарын дунд “Зөв зан чанар – Хотын соёл” илтгэлийн уралдааныг сургууль, дүүрэг, нийслэл гэсэн 3 үе шаттайгаар зохион байгуулав.

Уг уралдаанд нийт 202 илтгэл ирсэн бөгөөд гурав дахь шатны шалгаруулалт буюу нийслэлийн хэмжээний шалгаруулалтыг 2017 оны 05 дугаар сарын 17-ны өдөр зохион байгуулж шалгарсан 26 илтгэл хэлэлцэгдсэнээс 76 дугаар сургуулийн физикийн багш Н.Дүүрэнхундага нэгдүгээр байр, Эрдмийн өргөө цогцолбор сургуулийн химийн багш Б.Мөнхтуяа хоёрдугаар байр, 11 дүгээр сургуулийн монгол хэл уран зохиолын багш Ц.Март гуравдугаар байр эзэлж, өргөмжлөл, мөнгөн шагнал хүртсэн.

Шагналт байр эзэлсэн багш нарын туршлага, хичээлийн агуулгаар ирэх хичээлийн жилээс эхлэн сургалтын хөтөлбөрт оруулах талаар судалж хэрэгжүүлэхээр зохион байгуулагчид тохиролцов. Багш нарын дундахх илтгэлийн уралдааны санхүүгийн асуудлыг шийдвэрлэж, их хотын соёлд хувь нэмрээ оруулсан “Өөрчлөлтийг чиглүүлэгч төв” ТББ-ын хамт олондоо цаашдын нь ажил, хөдөлмөрт өндөр амжилт хүсэн ерөөе.

НИЙСЛЭЛИЙН СОЁЛ, УРЛАГИЙН ГАЗАР

Монгол Улсын Их сургуулийн Шинжлэх ухааны сургууль, Монголын Соёл судлалын холбоотой хамтран “Соёл судлаачдын үндэсний X семинар”-ыг өнөөдөр Монгол Улсын Их сургуулийн байранд зохион байгууллаа. Нийслэлийн Соёл, урлагийн газар үүсэн байгуулагдсаны 80 жилийн ойн хүрээнд зохион байгуулсан энэхүү семинарт Монголын их, дээд сургуулиудын багш, эрдэмтдээс гадна ОХУ, ХБНГУ, Казахстан улсуудаас төлөөлөл оролцож илтгэл хэлэлцүүллээ. “Соёл судлаачдын үндэсний X семинар” I) Соёлын философи, соёлын түүх ба онол, II) Соёлын удирдлага, соёлын үйлдвэрлэл, хотын соёл, III) Боловсрол судлал, заах арга, IV) Угсаатан судлал, шашин судлал, V) Хэл шинжлэл, урлаг судлал гэсэн салбар хуралдаануудын хүрээнд явагдаж, нийт 41 илтгэл хэлэлцүүлж, семинараас зөвлөмж гарган Соёлын үйлдвэрлэл, нийтийн соёлын чиглэлийн судалгааны ажлуудад Нийслэлийн Соёл, урлагийн газар их дээд сургуулиудын судлаачид, багш нартай хамтран ажиллахаар боллоо.

НИЙСЛЭЛИЙН СОЁЛ, УРЛАГИЙН ГАЗАР

“Номын соёлт ертөнц” ТББ-аас санаачлан жил бүрийн хавар зохион байгуулдаг “Улаанбаатар бүүк фэйр-2017” номын баяр эхэллээ. Нийслэлийн Засаг даргын Тамгын газар, Нийслэлийн Соёл, урлагийн газрын дэмжлэгтэйгээр зохион байгуулагдаж буй энэхүү баярт зохиолчид, ном эрхлэн гаргагч, хэвлэлийн компани, хуучин номын худалдаа эрхлэгчдээс гадна “Эмпати” байгууллага, “Улаанбаатар элит” олон улсын сургууль хамтран ажиллаж байна.

Номын баярын үеэр 5-40 хүртэл хувийн хямдралтай номын худалдаа, үйлчилгээ гарч байгаа бөгөөд “Хорвоогийн өнгө” олон улсын соёлын наадамтай хамтатган зохион байгуулж байгаагаараа онцлог юм. Номын баяр 2017 оны 05 дугаар сарын 12, 13-ны өдрүүдэд Д.Сүхбатаарын талбайд болно.

НИЙСЛЭЛИЙН СОЁЛ, УРЛАГИЙН ГАЗАР

“Ulaanbaatar book fair”-аар Монголын ном бүтээгчид, гадны соёлын байгууллага, хэвлэн нийтлэгчид мэдээллээ түгээх, харилцан соёлын солилцоо өрнүүлэхэд чиглэгдэж 2017 оны 05 дугаар сарын 12, 13-ны өдрүүдэд Д.Сүхбаатарын талбайд зохион байгуулагдана.

Ном бүтээгч, уншигчдын нэрлэж заншсанаар хаврын номын баяр маань өнгөрсөн жилээс олон улсын номын баяр хэмээн нэрлэгдэх болсон юм. 21 дэх “Ulaanbaatar book fair”  олон улсын номын баярын арга хэмжээний онцлох сонирхолтой үзүүлбэр бол “Хорвоогийн олон өнгө” олон улсын хэл соёлын их наадам, их зохиолч Ч.Лодойдамбын  100 жилийн ойд зориулсан арга хэмжээнүүд юм.

“Номын соёлт ертөнц” ТББ-аас номын баярын арга хэмжээг 21 дэх удаа,  “Эмпати ертөнц ХХК”-аас олон улсын хэл соёлын их наадмыг Монгол улсад гурав дахь жилдээ зохион байгуулж байна.  Өнөөдрийн энэхүү арга хэмжээ нь нийслэл хотод болдог сонирхолтой арга хэмжээнүүдийн нэг юм.

Энэ жилийн номын баярт АНУ, Франц, Солонгос гэх зэрэг орнуудын соёлын байгууллага ном бүтээл, хэл соёлоо сурталчлан оролцож байгаа бол 18 улсын хүүхэд залуус, Улаанбаатар чуулга,  Монгол кино нэгтгэл урлагийн тоглолтоо толилуулна.

Номын баярын өдөр:

1. International book fair  нэвтрүүлэг бэлтгэх
2. Баярын тухай фото судалбар бэлтгэх
3. “Номын ертөнц” сэтгүүлийн тусгай дугаар
4. Ч.Лодойдамба-100 дүрийн тоглолт
5. Хорвоогийн олон өнгө урлагийн тоглолт
6. Улаанбаатар чуулгын тоглолт
7. Явуулын номын сангийн үйлчилгээ
8. Хотын нийтийн номын сангуудын өдөрлөг
9. Олон улсын номын сангийн чиг хандлага, үйлчилгээ уулзалт
10. Цахим номын сангийн өнөөгийн чиг хандлага танилцуулга
11. Монгол дахь гадаадын соёлын төвүүдийн үзэсгэлэн
12. Book art үзэсгэлэн
13. Уран бичлэгийн үзэсгэлэн
14. Номын тэмдэглэлийн үзэсгэлэн
15. Шинэ номын нээлт, танилцуулга
16. Зохиолчдын гарын үсэгтэй, хямдралтай худалдаа
17. Орон орны хэлээр яруу найргийн уншлага
18. Номын клубын өдөрлөг
19. Циркийн үзүүлбэр
20. Номын хандив цуглуулах
21. “80 номын уналт” хөгжөөнт тоглоом болох юм.

НИЙСЛЭЛИЙН СОЁЛ, УРЛАГИЙН ГАЗАР

Монгол Улсад найрал дуу үүсч хөгжсөний 70 жилийн ойн хүрээнд “Монголын найрал дууны уран бүтээлчдийн холбоо”, нийслэлийн Соёл урлагийн газартай хамтран нийслэлийн Засаг даргын Тамгын газрын дэмжлэгтэйгээр “УЛААНБААТАРЫН ХАВАР 2017” олон улсын анхдугаар их наадмыг энэ сарын 10-12-ны өдрүүдэд Улаанбаатар хотноо зохион байгуулах гэж байна. “Улаанбаатарын хавар 2017” олон улсын найрал дууны анхдугаар их наадмыг Нийслэлийн Засаг дарга бөгөөд Улаанбаатар хотын захирагчийн ивээл дор зохион байгуулж байгаа юм. Наадмын нээлт өнөөдөр их жанжин Д.Сүхбаатарын талбайд боллоо. Нээлтэд нийслэлийн Засаг дарга бөгөөд Улаанбаатар хотын Захирагч С.Батболд, Монголын найрал дууны уран бүтээлчдийн холбооны тэргүүн, хормейстер Ц.Эрдэнэтуяа болон холбогдох албаны хүмүүс оролцов.

Нийслэлийн Засаг дарга бөгөөд Улаанбаатар хотын захирагч С.Батболд наадмыг нээж хэлсэн үгэндээ “Найрал дууны урлаг нь хүүхэд залуусын хүмүүжил, гоо зүйн мэдрэмж, багаар ажиллах чадварыг нэмэгдүүлэхээс гадна хүнлэг, энэрэнгүй, зөв иргэн болон төлөвшихөд онцгой ач холбогдол өгдөг тул нийслэлийн удирдлагын зүгээс цаашид дэмжин ажиллах болно. Нүүдэлчдийн их соёлын өлгий Монгол Улсын нийслэл Улаанбаатар хотоо нийслэлчүүд бид зүүн хойд Азийн бизнес, аялал жуулчлал, соёл урлагийн төв болгох зорилтыг дэвшүүлэн ажиллаж байна. Энэхүү зорилтын хүрээнд цаашид жил бүр олон улсын томоохон наадмуудыг зохион байгуулахаар төлөвлөж байгааг энэ дашрамд дурдахад таатай байна” хэмээн онцолсон юм.

“Монголын найрал дууны уран бүтээлчдийн холбоо” нь 2005 оноос Найрал дууны их наадмыг “Хаврын баяр” нэртэйгээр есөн удаа амжилттай зохион байгуулсаар ирсэн юм. Энэ жил наадмынхаа цар хүрээг тэлж олон улсын хэмжээнд зохион байгуулж байгаагаараа онцлогтой юм. Анхдугаар их наадамд УДБЭТ, ЦДБЭЧ, ХЦДБЧ, СУИС, МУБИС, СИТИ дээд сургууль, Хөгжим, бүжгийн коллеж зэрэг мэргэжлийн урлагийн байгууллага, сургуулиудын хамтлаг дуучид, ОХУ-ын Буриад Улсын П.И.Чайковскийн нэрэмжит урлагийн коллежийн оюутны найрал дуу, БНХАУ-ын ӨМӨЗО-ны Алша аймгийн Зүүн хошууны Улаан мөчрийн цөөхүүл дуучид, Хөлөнбуйр аймгийн Шинэ Барга зүүн хошууны Барга хүүхдийн найрал дууны бүлгэм, БНСУ-ын “Тэнгэрийн дуу” найрал дууны хамтлаг зэрэг гадаад дотоодын нийт 24 хамтлагийн 1000 гаруй уран бүтээлч оролцож байна.

Хүүхдийн найрал дууны тоглолт өнөөдөр буюу тавдугаар сарын 10-нд Улаанбаатар чуулгын байранд, Гадаад хамтлагуудын нэгдсэн тоглолт тавдугаар сарын 11-нд Улсын Филармонийн концертын танхимд болно. Олон улсын наадмын Гала тоглолт УДБЭТ-ын тайзнаа тавдугаар сарын 12-нд тус тус болох юм.

НИЙСЛЭЛИЙН СОЁЛ, УРЛАГИЙН ГАЗАР